ខេត្តក្រចេះ ៖ កាលពីរសៀលថ្ងៃទី២៥ ខែឧសភា ឆ្នាំ២០១៨ ម្សិលមិញនេះ មានប្រជាពលរដ្ឋចាស់ក្មេង ជិត១០០នាក់ រស់នៅឃុំចង្រ្គង់ ស្រុកចិត្របុរី ខេត្តក្រចេះ មានអាការៈដូចៗគ្នា គឺ ក្អួតចង្អោ ឈឺពោះ អស់កម្លាំង និងរាក ដោយសារហូបនំបុ័ង ត្រូវបានបញ្ជូនទៅសម្រាកព្យាបាល នៅមណ្ឌលសុខភាព និងមន្ទីពេទ្យបង្អែកខេត្តក្រចេះ។ នេះបើតាមការបញ្ជាក់របស់ លោក ហង្ស ចាន់ឌី អភិបាលស្រុកចិត្របុរី។

បើតាមសម្តីរបស់សមត្ថកិច្ចបានប្រាប់ថា នៅរសៀលថ្ងៃទី២៥ ខែឧសភា ឆ្នាំ២០១៨ ខាងមន្ទីរកសិកម្មបានចុះ ទៅណែនាំឲ្យពលរដ្ឋដាំឡូងមី ហើយបានចែកនំបុ័ងឲ្យដល់ប្រជាពលរដ្ឋហូប ជាអាហារសម្រន់។ បន្ទាប់មកក៏មានអាការៈពុលតែម្ដងទៅ ប៉ុន្តែអ្នកហូបខ្លះទៀតក៏មិនបានពុលដែរ។ ខណៈពេលនេះ ជនរងគ្រោះខ្លះក៏មានអាការៈធូរស្បើយ ខ្លះហើយ ហើយក៏ត្រលប់មកពីលំនៅដ្ឋានវិញហើយដែរ៕ ដោយ៖ ថា