ភ្នំពេញ៖ ថ្មីៗនេះ តារាសម្តែងលោក ឆាយ គន្ធា ដែលមានមុខងារជាមន្ត្រីជាន់ខ្ពស់នៅកងរាជអាវុធហត្ថ មានក្តីហ្មងសៅជាមួយបងប្អូនមួយចំនួន បាននាំគ្នាឧបត្ថម្ភទូរស័ព្ទ និងថវិកាជូនលោកមន្ត្រីប៉ូលីសទះកំផ្លៀងមនុស្សស្រីទន់ខ្សោយនៅជិតផ្សារអូឡាំពិកឡើយ ដោយលោកបានលើកឡើងថា «ខ្ញុំមិនគាំទ្របុគ្គលជាអ្នកអនុវត្តច្បាប់ចរាចរ ដែលជាបទល្មើសលហុ បង្កហឹង្សានៅទីសាធារណៈ ហើយត្រូវបានបុគ្គលមួយចំនួនលើកទឹកចិត្ត ហាក់ដូចជាគាំទ្រនូវការប្រើប្រាស់អំពើហឹង្សានៅក្នុងសង្គម»។

ទាក់ទិននឹងរឿងនេះ មន្ត្រីនគរបាលប៉ុស្តិ៍អូរឡាំពិកឈ្មោះ​ កៅ​ សំអុល​ ដែលប្រើហិង្សាលើស្ត្រីម្នាក់នៅជិតផ្សារអូរឡាំពិកនោះត្រូវបានផ្អាកពី​ការងារ​បណ្តោះអាសន្ន ករណី​ប្រើ​ហិង្សា លើ​ស្ត្រី​ជីះ​ម៉ូតូ អត់​ពាក់​មួយ​សុវត្ថិភាព នា​ព្រឹកថ្ងៃ​ទី២២ ខែឧសភា ឆ្នាំ២០១៨ នៅចំណុចក្បែរផ្សារអូឡាំពិក ខណៈពេលនេះ ទទួលបានអំណោយទូរស័ព្ទចំនួន ៣គ្រឿងហើយ បន្ទាប់ពីទូរស័ព្ទចាស់របស់ខ្លួនត្រូវបានខូចដោយសារស្ត្រីរងគ្រោះវាយទម្លាក់ពីដៃខណៈដែលប្រើទូរស័ព្ទនោះថតវីដេអូ (ថតស្ត្រីរងគ្រោះ) ។ ក្រោយពីដឹងថាជនសង្ស័យបង្កអំពើហិង្សាលើស្ត្រីភេទឈ្មោះ កៅ សំអុល មន្ត្រីនគរបាលប៉ុស្តិអូរឡាំពិកមានតែទូរស័ព្ទមធ្យមមួយគ្រឿងប្រើប្រាស់ប្រចាំថ្ងៃ និងត្រូវបានខូចទៀតនោះ ស្រាប់តែម្ចាស់គណនីហ្វេសប៊ុកមួយឈ្មោះ Piseth Ouk បានប្រកាសស្វែងរកលោក អនុសេនីយ៍ទោរូបនេះ ដើម្បីជូនទូរស័ព្ទមួយគ្រឿងម៉ាក Iphone 6plus ដល់លោក ហើយសម្រាប់ថ្ងៃនេះម្ចាស់ហាងទូរស័ព្ទ Jet Black Stor ក៏បានប្រកាសជូនទូរស័ព្ទថ្មីពីប្រអប់ម៉ាក Samsung ម៉ូដែល A5 2017 មួយគ្រឿងដល់លោក កៅ សំអុល ផងដែរ ។ មិនត្រឹមតែប៉ុណ្ណោះ មុននេះលោក ផែង វណ្ណៈ អ្នកស្នេហ៍យុត្តិធម៌ កំពុងតែមានប្រជាប្រិយភាពខ្លាំង ទាំងក្នុង និងក្រៅបណ្ដាញសង្គមហ្វេសប៊ុក ក៏បានរួមចំណែកជាមួយព្រះតេជគុណ ធឹង ច័ន្ត្រា ព្រះគ្រូចៅអធិការវត្តប៉ាឆា ក្រុង ក្រចេះ និងសប្បុរសជនម្នាក់ នៅខេត្តសៀមរាបទិញទូរស័ព្ទថ្មីមួយគ្រឿងម៉ាក Huawei ម៉ូដែល Y9 2018 មួយគ្រឿងជូនលោក កៅ សំអុល ព្រមទាំង ថវិកាចំនួន ២០០ដុល្លារបន្ថែមទៀតផងដែរ ។ សូមរំឭកដែរថា នាយឧត្តមសេនីយ៍ ជួន សុវណ្ណ អគ្គស្នងការរង និងជាស្នងការនគរបាលរាជធានី បានឱ្យដឹងថា មន្ត្រីនគរបាលប៉ុស្តិ៍ អូឡាំពិកឈ្មោះ កៅ សំអុល ដែលបានប្រើអំពើហិង្សាលើស្ត្រីម្នាក់ នៅជិតផ្សារអូឡាំពិកនោះ ត្រូវបានឃាត់ខ្លួនហើយនាំមកកាន់ ស្នងការដ្ឋាន ដើម្បីអនុវត្តន៍តាមវិន័យ កងកម្លាំងនគរបាលជាតិ ៕