រាជធានីភ្នំពេញ ៖ មានករណីគ្រោះថ្នាក់ចរាចរណ៍ដ៏រន្ធត់មួយ រវាងរថយន្តហាយឡែនឌ័រ និងរថយន្តហុីឡាក់វីហ្គោ បានបុកគ្នានៅចំណុចផ្លូវបំបែកជាបួនយ៉ាងពេញទំហឹង បណ្ដាលឲ្យរថយន្តហុីឡាក់វីហ្គោធ្លាក់ចូលប្រឡាយទឹកល្អុយ ឯរថយន្តហាយឡែនឌ័រខ្ទេចផ្នែកខាងមុខ និងរបួសធ្ងន់ម្នាក់ ។

ហេតុការណ៍នេះ បានបង្កការភ្ញាក់ផ្អើលដល់ប្រជាពលរដ្ឋនៅវេលាម៉ោង៣ និង១០នាទីទៀបភ្លឺ ថ្ងៃទី២៥ ខែមិថុនា ឆ្នាំ២០១៨ ស្ថិតនៅតាមបណ្ដោយផ្លូវលេខ១០៥ កែងនិងផ្លូវលេខ៤៣២ ក្នុងសង្កាត់បឹងត្របែក ខណ្ឌចំការមន រាជធានីភ្នំពេញ ។ យោងតាមប្រភពព័ត៌មានពីកន្លែងកើតហេតុបានឲ្យដឹងថា មុនពេលកើតហេតុ គេឃើញរថយន្តមួយគ្រឿងម៉ាកហាយឡែនឌ័រពណ៌ទឹកប្រាក់ ពាក់ស្លាកលេខភ្នំពេញ 2AB-9343 បើកដោយបុរសម្នាក់រួមដំណើរប្រុសពីរនាក់ ធ្វើដំណើរទិសដៅពីលិចទៅកើត ខណះមកដល់ចំនុចកើតហេតុខាងលើ ស្រាប់តែមានរថយន្តមួយគ្រឿងទៀតម៉ាក ហុីឡាក់វីហ្គោ ពណ៌ទឹកប្រាក់ មិនឃើញស្លាកលេខ(ដោយសារនៅក្នុងទឹឹកល្អុយ ) បើកបរដោយប្រុស រួមដំណើរស្រីពីរនាក់ជាមួយ បានធ្វើដំណើរតាមបណ្ដោយផ្លូវលេខ១០៥ ទិសដៅពីជើងទៅត្បូង ហើយក៏បានបុករថយន្តហាយឡែនឌ័រចំប្រឆិតពីមុខយ៉ាងពេញទំហឹងតែម្ដង បណ្ដាលឲ្យរថយន្តហុីឡាក់វីហ្គោ ផ្លោងទៅបុកនិងបង្កាន់ដៃដែក ធ្វើឲ្យបាក់ធ្លាក់រថយន្តចូលប្រឡាយលូរទឹកល្អុយតែម្ដង សំណាងល្អត្រូវបានបងប្អូនប្រជាពលរដ្ឋវាយកញ្ចក់យកអ្នកតៃកុងនិងនារីម្នាក់ដែលរួមដំណើរទាន់ពេលវេលា ។​ ចំណែកភាគីខាងរថយន្តហាយឡែនឌ័របានរងការខូចខាតផ្នែកខាងមុខយ៉ាងដំណំ និងធ្វើឲ្យតៃកុងរថយន្តរងរបួសបាក់ដៃម្នាក់ត្រូវបញ្ជូនទៅសង្គ្រោះនៅឯមន្ទីពេទ្យរុស្សុីផងដែរ ។ ក្រោយពេលកើតហេតុ សមត្ថកិច្ចមូលដ្ឋានបានទាក់ទងទៅខាងជំនាញចរាចរណ៍ក្រុង ឲ្យចុះមកធ្វើការវាស់វែងយករថយន្តទាំងពីរគ្រឿងទៅរក្សាទុក​នៅឯស្នងការដ្ឋាននគរបាលចរាចរណ៍ផ្លូវគោករាជធានីភ្នំពេញ រងចាំឲ្យភាគីទាំងពីរចូលខ្លួនមកដោះស្រាយតាមផ្លូវច្បាប់​ ៕ ដោយ៖ ភារ៉ា