រថយន្តកូរ៉េធន់ធំ ប្រលះសួនទ្រូងផ្លូវ ហើយហោះទៅបុករះបង្គោលភ្លើងនិងរបងផ្ទះប្រជាពលរដ្ឋ បណ្ដាលឲ្យរងការខូចខាតយ៉ាងដំណំ

ភ្នំពេញ ៖ រថយន្តកូរ៉េធន់ធំមួយគ្រឿង បានធ្វើដំណើរក្នុងក្បឿនយ៉ាងលឿន ហើយរេចង្កូតឡើងលើសួនទ្រូងផ្លូវ បុកបង្គោលស្លាកប៉ាណូបាក់មួយដើម ហើយហោះទៅបុករះបង្គោលភ្លើងនិងផ្ទះប្រជាពលរដ្ឋបន្ថែមទៀត បណ្ដាលឲ្យរងការខូចខាតដំណំ សំណាងល្អមិនបង្កឲ្យមនុស្សរងរបួស ។

ហេតុការណ៍គ្រោះថ្នាក់ចរាចរណ៍ខាងលើនេះ បានបង្កឡើងនៅវេលាម៉ោង១រំលងអាធ្រាត ឈានចូលថ្ងៃទី១៦ ខែកក្កដា ឆ្នាំ២០១៨ ត្រង់ចំណុចមុខសាលាសង្កាត់គោកឃ្លាង តាមបណ្ដោយផ្លូវហាន់ណូយ ស្ថិតក្នុងសង្កាត់ភ្នំពេញថ្មី ខណ្ឌសែនសុខ រាជធានីភ្នំពេញ ។
រថយន្តបង្កម៉ាក កូរ៉េ ៤តោន ពាក់ស្លាកលេខភ្នំពេញ 3B-4825 ។ ឯសំភារៈដែលខូចខាតរួមមាន៖ សួនទ្រូងផ្លូវ បង្គោលស្លាកប៉ាណូមួយដើម បង្គោលភ្លើងមួយដើម និងរបងផ្ទះប្រជាពលរដ្ឋ ។
យោងតាមប្រភពព័ត៌មានពីប្រជាពលរដ្ឋដែលឃើញហេតុការណ៍ខាងលើ បានប្រាប់ឲ្យដឹងថា នៅពេលកើតហេតុ គេឃើញរថយន្តបង្កលើ បានធ្វើដំណើរតាមបណ្ដោយផ្លូវហាន់ណូយ ទិសដៅពីជើងមកត្បូងក្នុងល្បឿនយ៉ាងលឿន ខណះមកដល់ចំណុចកើតហេតុ សង្ស័យអ្នកបើកបរងងុយដេកមិនដឹង ស្រាប់តែរេចង្កូតឡើងលើសួនទ្រូងផ្លូវ បុកបង្គោលស្លាកប៉ាណូបាក់មួយដើម ហើយហោះទៅបុកបង្គោលភ្លើងនៅចញ្ចើមផ្លូវបាក់អស់មួយដើមនិងទំលុះរបងផ្ទះប្រជាពលរដ្ឋបន្ថែមទៀត បណ្ដាលឲ្យរងគាប់ជាប់និងរបង រងការខូចខាតដំណំ តែសំណាងល្អមិនបង្កឲ្យមនុស្សរងរបួស ។
ក្រោយកើតហេតុ ទាំងតៃកុងរថយន្ត និងព្រូ បានឡើងជិះម៉ូតូគេចខ្លួនបាត់អស់ ដោយបន្សល់រថយន្តនៅនិងកន្លែងកើតហេតុ ។ បន្ទាប់មកសមត្ថកិច្ចមូលដ្ឋាន និងជំនាញចរាចរណ៍ក្រុង បានចុះមកធ្វើការវាស់យករថយន្តបង្កខាងលើ ទៅរក្សាទុកនៅការិយាល័យ នៃស្នងការដ្ឋាននគរបាលចរាចរណ៍ជើងគោករាជធានីភ្នំពេញ ដើម្បីរងចាំដោះស្រាយគ្នាតាមផ្លូវច្បាប់ ៕
ដោយ៖ ភារ៉ា