តារាសម្ដែង ញ៉ែម សុគន្ធ បើករថយន្តបុករះរបាំងថ្មទ្រូងផ្លូវលាន់ដូចរន្ទះ បណ្ដាលឲ្យរងរបួសខ្លួនឯង និងខ្ទេចរបាំងថ្មអស់២កង់
-

ភ្នំពេញ ៖​ តារាសម្តែងនិងអតីតជា Freshy boy ម្នាក់ បានបើករថយន្តម៉ាកហាយឡែនឌរ័ ជ្រុលទៅបុករបាំងថ្មពុះចែកទ្រូងផ្លូវ បណ្តាលឲ្យរងខូចខាតទាំងរថយន្តទាំងទ្រូងផ្លូវតែសំណាងល្អ​តារាសម្តែងរូបនោះមិនរងរបួសធ្ងន់នោះទេ ។

ក្នុងឧបទ្ទវហេតុ​គ្រោះថ្នាក់ចរាចរណ៍​ខាងលើនេះ បានកើតឡើងកាលពីវេលាម៉ោង១១:៥០នាទីយប់ ថ្ងៃអាទិត្យ ៩រោច​ខែទុតិយា​​សាឍ​ ឆ្នាំច សំរឹទ្ធិសក័ ព.ស​២៥៦២ ត្រូវនឹងថ្ងៃទី០៥ ខែសីហា​ ឆ្នាំ២០១៨ នៅត្រង់ចំណុចផ្លូវបំបែកជាបួន​ តាមបណ្ដោយផ្លូវម៉ៅសេទុង កែងផ្លូវ១៩៣ ស្ថិតក្នងទួលស្វាយព្រៃ២ ខណ្ឌចំការមន​ រាជធានីភ្នំពេញ។ ។
យោងតាមសាក្សីនៅក្បែរកន្លែងកើតហេតុបានរៀបរាប់ប្រាប់ថា នៅមុនពេលកើតហេតុ គាត់ឃើញបុរសម្នាក់ ដែលគេស្គាល់ថាជាលោក ញ៉ែម សុគន្ធ​ បានធ្វើដំណើរក្នុងរថយន្តម៉ាក Highlander មួយគ្រឿង ពណ៌​ស្ករ ពាក់ស្លាកលេខភ្នំពេញ 2AK-5321 តាមបណ្ដោយផ្លូវម៉ៅសេទុង ទិសដៅពីកើតទៅលិច ក្នុងល្បឿនយ៉ាងលឿន លុះមកដល់ចំណុចកើតហេតុ​ មិនដឹងយ៉ាងម៉េច ក៏ស្រាប់តែឃើញរថយន្តរេចង្កូតទៅបុកក្បាលនាគពុះចែកទ្រូងផ្លូវពេញទំហឹងតែម្ដង បណ្តាលឲ្យបាក់ទ្រូងផ្លូវ​ចំនួន២កង់ខ្ទេចខ្ទីតែម្ដង រីឯរថយន្តវិញរងការខូចខាតផ្នែកខាងមុខយ៉ាងដំណំ​ និងបណ្ដាលឲ្យលោក ញ៉ែម សុគន្ធ​ រងរបួសស្រាលផងដែរ​ ។
ក្រោយពេលកើតហេតុ សមត្ថកិច្ចមូលដ្ឋានបានចុះមកដល់កន្លែងកើត រួចទាក់ទងទៅកាន់សមត្ថកិច្ច​ជំនាញចរាចរណ៍ឲ្យចុះមកវាស់វែង នឹងស្ទូចយករថយន្តបង្កយកទៅរក្សាទុក នៅការិយាល័យចរាចរណ៍ផ្លូវគោក នៃស្នងការដ្ឋាននគរបាលរាជធានីភ្នំពេញ ដើម្បីរងចាំម្ចាស់រថយន្តចូលខ្លួនដោះស្រាយតាមនីតិវិធីច្បាប់៕
ដោយៈ​ ភារ៉ា