រថយន្តលុចសុីស570 ពាក់ស្លាកលេខរដ្ឋ 07 2-8989 បុកសួនចែកទ្រូងផ្លូវ និងបុកបង្កោលភ្លើងបាក់អស់មួយដើមរងការខូចខាតយ៉ាងដំណំ
- 2097

ភ្នំពេញ ៖ មានករណីគ្រោះថ្នាក់ចរាចរណ៍មួយបង្កឡើងដោយបុរសម្នាក់សង្ស័យស្រវឹងស្រា បានបើករថយន្តទំនើបម៉ាក លុចស៊ីស570 ទៅបុកឃឿនសួនច្បារពុះចែកទ្រូងផ្លូវ និងផ្លោងទៅបុកបង្គោលភ្លើងបាក់អស់១ដើមបាក់រាបដល់ដី ឯរថយន្តបង្កបានរងការខូចយ៉ាងដំណំ។

ហេតុការណ៍គ្រោះចរាចរណ៍ខាងលើនេះ បានកើតឡើងនៅវេលាម៉ោង៣ និង៣០នាទីទាបភ្លឺ ថ្ងៃពុធ ៤កើត ខែស្រាពណ៌ ឆ្នាំច សំរឹទ្ធិស័ក្រ ព.ស ២៥៦២ ត្រូវនឹងថ្ងៃទី១៥ ខែសីហា ឆ្នាំ២០១៨ នៅតាមបណ្ដោយផ្លូវជាតិលេខ៥ ត្រង់ចំណុចមុខវិទ្យាល័យឬស្សីកែវ ស្ថិតក្នុងសង្កាត់ឬស្សីកែវខណ្ឌឬស្សីកែវ រាជធានីភ្នំពេញ ។
តាមប្រភពព័ត៌មានពីកន្លែងកើតហេតុ បានឲ្យដឹងថាមុនពេលកើតហេតុ គេឃើញរថយន្តលុចស៊ីសLX570 ពណ៌ស ពាក់ស្លាកលេខ រដ្ឋ 07 2-8989 ដែលបើកបរដោយបុរសម្នាក់ទំនងមានស្ថានភាពស្រវឹង បានធ្វើដំណើរតាមបណ្ដោយផ្លូវជាតិលេខ៥ ទិសដៅពីត្បូងទៅជើង ក្នុងល្បឿនយ៉ាងលឿន លុះមកដល់ចំណុចកើតហេតុខាងលើ ក៏ស្រាប់តែរេចង្កូតទៅបុកនិងឃឿនសួនច្បារពុះចែកទ្រូងផ្លូវ និងផ្លោងទៅបុកបង្គោលភ្លើងនៅកណ្ដាលសួនបាក់អស់១ដើម ។ ភ្លាមនោះរថយន្តបង្កនៅមិនទាន់អស់ល្បឿន ក៏បានបន្តទៅមុខបន្ថែមប្រហែល៥០ម៉ែត្រ និងបំរុងបើកត្រឡប់ក្រោយគេចខ្លួន តែដោយសាររថយន្តបង្កបានដាច់កាឡែរកង់មុខ និងបែកកង់ទាំងមុខនិង​ក្រោយ ក៏មិនអាចបើកទៅមុខបាន ។
ក្រោយកើតហេតុ សមត្ថកិច្ចមូលដ្ឋានបានចុះឃាត់រថយន្តបង្ក ហើយទាក់ទងទៅសមត្ថកិច្ចជំនាញចរាចរណ៍ឲ្យមកធ្វើការវាស់វែង ស្ទួចយករថយន្តបង្កខាងលើ ទៅរក្សាទុកនៅការិយាល័យចរាចរណ៍ជើងគោក នៃស្នងការដ្ឋាននគរបាលរាជធានីភ្នំពេញ ដើម្បីរងចាំដោះស្រាយតាមនីតិវិធីច្បាប់នៅពេលក្រោយ៕
ដោយ៖ ភារ៉ា